លោក ជី រតនា មិនត្រឹមតែជាតារាសម្ដែងប៉ុណ្ណោះទេ តារារូបនេះចេះជំនាញជាច្រើន ដូចជា របាំសហសម័យ ល្ខោនខោល និង ភ្លេងបុរាណជាច្រើនមុខថែមទៀត ត្បិតអីលោកបានរៀនជំនាញសិល្បៈទាំងនោះតាំងពីវ័យ១០ឆ្នាំមកម្ល៉េះ។
តារាសម្ដែងក្នុងរឿង"សុបិនឡូយ៩"បានលើកថា បើនិយាយពីជំនាញខាងសិល្បៈខ្លួនបានបញ្ចប់បរិញ្ញាបត្រនាថសាស្ត្រ ដែលជាជំនាញសម្ដែងរបាំសហសម័យលើឆាក។ បច្ចុប្បន្នលោកគឺជាសមាជិកម្នាក់ក្នុងក្រុម"អម្រឹតាសិល្បៈ" ហើយឧស្សាហ៍សម្ដែងក្នុងកម្មវិធីថ្នាក់ជាតិនិងអន្តរជាតិជាច្រើន។
ប្រទេសដែលលោក ជី រតនា ធ្លាប់ទៅសម្ដែងមានដូចជា អាមេរិក កាណាដា ជប៉ុន កូឡុំប៊ី ជាដើម ហើយឆាប់ៗខាងមុខនេះក្រុម"អម្រឹតាសិល្បៈ"របស់លោក គ្រោងទៅសម្ដែងនៅទីក្រុង សាំងហ្គាពួរ ចំនួន១សប្តាហ៍ថែមទៀត។
ក្រៅពីសម្ដែងជាក្រុមខាងលើ លោក ជី រតនា ប្រាប់ថា ខ្លួនមានទីផ្សារសិល្បៈច្រើនទៀត ព្រោះលោកចេះលេងឧបករណ៍ភ្លេងបុរាណច្រើនមុខ ដូចនេះកម្មវិធីបុណ្យទានឬអាពាហ៍ពិពាហ៍ ម្ចាស់កម្មវិធីតែងជួលខ្លួនទៅលេងមិនទំនេរឡើយ។
ចំពោះការសម្ដែងភាពយន្តវិញ ដោយសារតែមានទេពកោសល្យខាងសិល្បៈបែបនេះ រតនា ក៏ត្រូវបានផលិតករភាពយន្តហៅថតរឿងជាបន្តបន្ទាប់។ ភាពយន្តដែលលោកធ្លាប់សម្ដែងមានដូចជារឿង"សុបិនឡូយ៩" រឿង"កាម៉ុងកំពត" រឿង"ដុំគ្រួស១ក្ដាប់" និង រឿង"ស្នេហ៍ស្វ័យគុណ៤"ជាដើម។
សូមស្ដាប់ការរៀបរាប់របស់ លោក ជី រតនា ជុំវិញការងារសិល្បៈខាងលើ៖
0 comments:
Post a Comment