លោក រិទ្ធី សំណាង ប្រធានក្លឹបភ្នំពេញក្រោន បានអះអាងថា ការប្រកួតជាមួយក្លឹប Buriram United ក្នុងជំនួបមិត្តភាពអន្តរជាតិនាវេលាម៉ោង ៦:០០នាទីស្អែកនេះនៅកីឡដ្ឋាន RSN ក្រុមទាំងពីរនឹងដាក់ជើងពេញដូចគ្នា។
លោក រិទ្ធី សំណាង (ទី១ ខាងឆ្វេង)
ក្នុងសន្និសីទកាសែតកាលពីរសៀលថ្ងៃទី១៧ ខែមករា ឆ្នាំ២០១៧ មុននេះលោក រិទ្ធី សំណាង បានឲ្យដឹងថា ក្រុមទាំងពីរបានធ្វើការត្រៀមកីឡាករល្អៗទាំងអស់ដូចគ្នា ដើម្បីធ្វើឲ្យការប្រកួតមានភាពជក់ចិត្ត។ ជំនួបនេះភ្នំពេញក្រោន ចង់ធ្វើតេស្តសមត្ថភាពកីឡាករក្មេងៗ មួយចំនួនត្រៀមចូលរួមប្រកួតពានរង្វាន់ AFC Cup ដែលនឹងមកដល់ចុងខែនេះ។
លោកបន្ថែមថា ការប្រកួតនេះក៏មានការព្រួយបារម្ភខ្លាចមានរបួសផងដែរ ព្រោះប្រកួតផ្លូវការជិតមកដល់។ ប៉ុន្តែទោះមានការព្រួយបារម្ភក្ដីត្រូវតែធ្វើ ដើម្បីស្វែងរកចំណុចខ្វះខាតរបស់ក្លឹប និងកែខៃចំណុចទាំងនោះឲ្យក្រុមខ្លាំង។
ងាកទៅកាន់គ្រូបង្វឹកក្រុមភ្នំពេញក្រោន លោក Oleg Starynskyi បាននិយាយថា វាជារឿងពិបាកមួយ ក្នុងការយកឈ្នះដៃគូជើងខ្លាំងដូចជា Buriram ។ ទោះបីការប្រកួតនេះជាជំនួបមិត្តភាព ដើម្បីដកស្រង់បទពិសោធន៍ ប៉ុន្តែក្រុមទាំងពីរមិនចង់ទទួលបានលទ្ធផលអាក្រក់នោះទេ។
Oleg Starynskyi
ចំណែកលោក Ranko Popovic គ្រូបង្វឹកក្រុម Buriram បញ្ចេញទស្សនថា ការប្រកួតស្អែកនេះក្រុមរបស់លោក នឹងធ្វើឲ្យបានល្អបំផុត។ លោកពិតជាសប្បាយចិត្តមែនទែន ដែលមានការប្រកួតមួយនេះ ហើយលោកសង្ឃឹមថា ក្រោយប្រកួតក្រុមទាំងពីរ នឹងអាចបង្កើនចំណងមិត្តភាពផងដែរ។
Ranko Popovic
ការប្រកួតមិត្តភាពនេះក៏មានការផ្សាយផ្ទាល់តាមរយៈទូរទស្សន៍ BTV ។ ភ្នំពេញក្រោន ប្រកួតមិត្តភាពនេះក្នុងគោលបំណងត្រៀមប្រកួត Play-Off ពានរង្វាន់ AFC Cup 2017 ទល់នឹងក្លឹប Home United របស់សិង្ហបុរីនាថ្ងៃទី៣០ ខែមករា ឆ្នាំ២០១៧ ៕
0 comments:
Post a Comment