«នៅមានសង្ឃឹមបង...ខ្ញុំគិតថា នៅអាចមានឱកាសបានឡើងទៅវគ្គផ្ដាច់ព្រ័ត្រ ទោះចាញ់ប្រកួតទី១ នេះក្ដី» ជាសម្ដីអ្នកប្រដាល់ យុគ យក្សផ្លែ ក្រោយបរាជ័យក្រោមថ្វីដៃ Kamlaiyouk ដោយពិន្ទុកាលពីម្សិលមិញក្នុងវគ្គសន្សំពិន្ទុលើកទី១ របស់ខ្លួនក្នុងកម្មវិធីសមរភូមិអ្នកប្រយុទ្ធរបស់ PNN ។
យុគ យក្សផ្លែ (ក្រហម)
អ្នកប្រដាល់មកពីក្លឹប បូរីរាជសីហ៍មានរិទ្ធិ រូបនេះបានឲ្យដឹងថា ការបរាជ័យលើកនេះជាការភ្លាត់នៅទឹកទី៣ ដែលបណ្ដោយអោយថៃឡើងជង្គង់ពេញធ្វើឲ្យរូបគេថយកម្លាំងខ្លាំង។ ប៉ុន្តែទោះបរាជ័យលើកនេះក្ដី រូបគេតាំងចិត្តថា នឹងប្រឹងប្រែងយកឈ្នះប្រកួតក្រោយៗ ពិសេសផ្ដួលដៃគូឲ្យសន្លប់ ដើម្បីបានឡើងទៅវគ្គផ្ដាច់ព្រ័ត្រ។
ការត្រៀមខ្លួនប្រកួតដណ្ដើមខ្សែក្រវាត់វគ្គសន្សំពិន្ទុលើកទី១នេះ យក្សផ្លែ ប្រាប់ថា បានហ្វឹកហាត់ពេញល្អ ហើយបើមានឱកាសជួបកីឡាករថៃរូបនេះម្ដងទៀត នឹងប្ដេជ្ញាយកឈ្នះឲ្យបាន។ សម្រាប់ជាការផ្ដាំផ្ញើទៅកាន់អ្នកគាំទ្រអ្នកប្រដាល់មិនសូវខ្ពស់រូបនេះ ប្ដេជ្ញាថា នឹងមិនធ្វើឲ្យអ្នកគាំទ្ររូបគេទាំងអស់ខកបំណងទៀតទេ។
សូមបញ្ជាក់ថា ការប្រកួតដណ្ដើមខ្សែក្រវាត់ខាងលើ កាលពីម្សិលមិញនេះ ម៉ន សាម៉េត ក៏បានបរាជ័យដោយពិន្ទុដូចគ្នាក្រោមដៃជើងខ្លាំង Phetnginthong ។ បេក្ខភាពកីឡាករកម្ពុជាមានតែ ពេជ្រ ម្ទេសខ្មាំង ម្នាក់ប៉ុណ្ណោះដែលដណ្ដើមបាន ៣ ពិន្ទុ។ ចំណែកខាងថៃអ្នកមាន ៣ ពិន្ទុមានបីរូបគឺ Phetnginthong , Kamlaiyouk និង Phoun Sawath ៕
0 comments:
Post a Comment