ខ្សែប្រយុទ្ធឆ្នើមរបស់ក្លឹបបឹងកេតអង្គរ ចាន់ វឌ្ឍនាកា បានចុះកុងត្រាលើកិច្ចសន្យាខ្ចីជើងចំនួន ១រដូវកាល កាលពីល្ងាចថ្ងៃទី១៣ ខែមករា ឆ្នាំ២០១៧ នេះជាមួយក្លឹប Fujieda MYFC ។ បន្ទាប់ពីចុះកុងត្រារួចរាល់កីឡាករមានដើមកំណើតមកពីខេត្តកំពតរូបនេះបានទម្លាយថា មានក្លឹបផ្សេងហ៊ានឲ្យតម្លៃក្នុងការផ្ទេរចេញខ្ពស់ជាងក្លឹបជប៉ុនមួយនេះទៅទៀត។
អតីតកីឡាកររបស់ក្លឹបព្រះខ័នរាជរូបនេះបានឲ្យដឹងថា តាមពិតមុនឈានដល់ការផ្ទេរចេញពីក្លឹបបឹងកេតអង្គរមានក្លឹបពីរឬបីបានទាក់ទងមកគេ ហើយអ្វីដែលគួរឲ្យចាប់អារម្មណ៍គឺក្លឹបផ្សេងទាំងនោះ ហ៊ានផ្ដល់ប្រាក់ខែខ្ពស់ជាងក្លឹបរបស់ជប៉ុនមួយនេះទៅទៀត។ ប៉ុន្តែចំពោះចំនួនប្រាក់ខែប៉ុន្មានគឺមិនត្រូវបានទម្លាយឲ្យដឹងនោះឡើយ។
ខ្សែប្រយុទ្ធស្នូលសំខាន់របស់បឹងកេតរូបនេះ បង្ហើបមូលហេតុដែលបោះបង់លុយធំ ហើយងាកមករកក្លឹបរបស់ជប៉ុន ពីព្រោះពេញចិត្តចំពោះការទទួលយ៉ាងយកចិត្តទុកដាក់ពីក្លឹបលំដាប់ទីបីមួយនេះនៅពេលទៅហ្វឹកហាត់នៅទីនោះចំនួន១ សប្ដាហ៍កាលពីពេលកន្លងទៅ។ ជាងនេះទៅទៀតរូបគេទទួលការជំរុញទឹកចិត្តពីក្រុមគ្រួសារ ក្នុងការសម្រេចទៅលេងនៅ ជប៉ុន និងក៏ជាចំណូលចិត្តរបស់គេផ្ទាល់់ដែលពេញចិត្តចំពោះរបៀបនៃការហ្វឹកហាត់យ៉ាងពិសេសរបស់ក្លឹប Fujieda MYFC ។
សូមបញ្ជាក់ថា ចាន់ វឌ្ឍនាកា នឹងពាក់អាវលេខ ១១ដដែលនៅក្លឹប Fujieda MYFC ព្រមទាំងហោះទៅទឹកដីជប៉ុននាកំឡុងពាក់កណ្ដាលខែកុម្ភៈ ឆ្នាំ២០១៧ ៕
0 comments:
Post a Comment