វិបសាយដ៏ល្បីរបស់វៀតណាមមួយ បានចេញផ្សាយពីតារាបាល់ទាត់ឆ្នើមរបស់ក្រុមជម្រើសជាតិកម្ពុជា ចាន់ វឌ្ឍនាកា ដោយដាក់រហស្សនាមឲ្យថា "Messi Cambodia” (Messi កម្ពុជា)។
ចាន់ វឌ្ឍនាកា ខ្សែប្រយុទ្ធឆ្នើមក្រុមជម្រើសជាតិកម្ពុជា
Kenh14 បានចេញផ្សាយថា ខ្សែប្រយុទ្ធ វឌ្ឍនាកា ពិតជាមានសមត្ថភាពអស្ចារ្យ សក្ដិសមនឹងរហស្សនាម "Messi កម្ពុជា” ពិតមែន ដោយសារកីឡាករវ័យក្មេងរូបនេះ មានល្បឿនលឿន បច្ចេកទេសញាក់ល្អ និងមានតិចនិកស៊ុតបញ្ចូលទីយ៉ាងអស្ចារ្យ ដែលធ្វើឲ្យខ្សែការពារពិបាកក្នុងការបិទ។ ប្រភពដដែលនេះបន្ថែមថា កីឡាករវ័យ២២ឆ្នាំរបស់កម្ពុជារូបនេះ ក៏កំពុងទាក់ទាញចំណាប់អារម្មណ៍បណ្ដាសារព័ត៌មានល្បីៗជុំវិញពិភពលោក មិនចាញ់តារាឆ្នើម Le Cong Vinh ប្រធានក្រុមជម្រើសជាតិវៀតណាម និង Teerasil Dangda ប្រធានក្រុមជម្រើសជាតិថៃនោះទេ។
សម្រាប់យុទ្ធនាការពានរង្វាន់ AFF Suzuki Cup 2016 វឌ្ឍនាកា ក៏ត្រូវបានទូរទស្សន៍ដ៏ល្បីរបស់អាមេរិក Fox Sports បានដាក់រហស្សនាមថា "Golden Boy” របស់កម្ពុជាផងដែរ។ ទោះបីកម្ពុជា ចាញ់ទាំង៣ប្រកួតក្នុងពូល B ប៉ុន្តែខ្សែប្រយុទ្ធរបស់ក្លឹបបឹងកេតអង្គរ (វឌ្ឍនាកា) បង្ហាញទម្រង់លេងយ៉ាងល្អ ដោយអាចស៊ុតចូលម៉ាឡេស៊ី ២គ្រាប់ និង Assist ឲ្យមិត្តរួមក្រុម សុះ ស៊ូហាណា ស៊ុតចូលមីយ៉ាន់ម៉ា១គ្រាប់ មុនពេលប្រកួតចុងក្រោយប៉ះវៀតណាមយប់មិញ ធ្វើឲ្យខ្សែការពារវៀតណាមទទួលបានកាតក្រហមម្នាក់៕
0 comments:
Post a Comment